ಆರಂಭ

ಪ್ರಿಯ ಓದುಗರೆ,

ಐದು ವರ್ಷಗಳಿಂದ ಅಣುಗಾತ್ರದ ಹೆಜ್ಜೆ ಇಟ್ಟು ಬರೆಯುತ್ತಾ ಬಂದವಳು ನಾನು.

ನನ್ನ ಕಿರುಗತೆ ಮತ್ತು ಕೆಲವು ಕವನಗಳನ್ನು ಓದಿ ಪ್ರೋತ್ಸಾಹಿಸಿದವರು ನೀವು. 

ಹೀಗೆ ನನ್ನ ಪ್ರಕಟಿತ ಬರಹಗಳನ್ನು ಓದಿ ಹುರಿದುಂಬಿಸಿದ ನಿಮ್ನೆಲ್ಲರ ಪ್ರೀತಿಯಿಂದ ನಾನು ಈ ಬ್ಲಾಗ್ ಆರಂಭಿಸುತ್ತಿದ್ದೇನೆ. ನನ್ನ ಕೆಲವು ಪ್ರಕಟಿತ ಬರಹಗಳು ಇಲ್ಲಿ ಮರುಕಳಿಸಬಹುದು. ಅದನ್ನೂ ನೀವು ಪ್ರೋತ್ಸಾಹಿಸುತ್ತೀರಿ ಎಂಬ ನಂಬಿಕೆ ನನ್ನಿಲ್ಲಿದೆ. 

ಬ್ಲಾಗ್ ಆರಂಭಿಸುವ ವಿಚಾರ ನನ್ನಲ್ಲಿದ್ದರೂ ಅದಕ್ಕೆ ರೂಪ ಕೊಡುವ ಕೆಲಸ ನನ್ನಿಂದಾಗಿರಲಿಲ್ಲ. ಯಲ್ಲಾಪುರ, ಶಿರಸಿ,ದಕ್ಷಿಣ ಕನ್ನಡ,  ನಾನಾ ಭಾಗದ ಓದುಗರು ಮತ್ತು ಬರಹಗಾರು ನನ್ನೊಟ್ಟಿಗಿದ್ದು ಅವರ ಕೆಲವು ನುಡಿಗಳು ನನಗೆ ಸ್ಪೂರ್ತಿ ತಂದಿದೆ. ನನ್ನೆಲ್ಲಾ ಸ್ನೇಹಿತರು ಬರಹಗಳನ್ನು ಓದಿ ಹುರಿದುಂಬಿಸಿದಕ್ಕಾಗಿ ನನ್ನ ಲೇಖನಿಗಳು ಹರ್ಷಪಡುತ್ತಿವೆ.

ವೈದ್ಯಕೀಯ ವೃತ್ತಿಯಲ್ಲಿದ್ದ ನನ್ನ ಅಕ್ಕ ಪುಟ್ಟ ಮಗುವನ್ನು ಪೋಷಿಸುತ್ತಾ. ನನ್ನೊಟ್ಟಿಗೆ ಈ ವಿಷಯ ಪ್ರಸ್ತಾಪಮಾಡಿದಾಗ. ಬರೆಯಲು ಸಮಯವಿಲ್ಲ ಎಂದುತ್ತರಿಸಿದ ನನಗೆ. ಅವಳ ದಿನದ ಕಾಯಕಗಳೇ ಸ್ಪೂರ್ತಿ. ಒಬ್ಬ ತಾಯಿಯಾಗಿ, ಮಡದಿಯಾಗಿ, ವೈದ್ಯೆಯಾಗಿ, ಕೆಲವೆಡೆ ಇನ್ನೂ ಕಲಿಕೆಯಲ್ಲಿ ನಿರತಳಾಗಿ, ಗೃಹಿಣಿಯೂ ಆಗಿ ಅವಳ ಸಮಯ ಪರಿಪೂರ್ಣ. ಕೇವಲ ವಿದ್ಯಾರ್ಥಿಯಾದ ನನಗೆ ಸಮಯವಿಲ್ಲ ಎಂಬ ಮಾತು.......?!

ಇನ್ನು ನನ್ನ ಪ್ರತಿಯೊಂದು ಬರಹಳನ್ನು ವೈಯಕ್ತಿಕವಾಗಿ ಓದಿ ವಿಮರ್ಶೆಮಾಡಿ ನನ್ನ ಕತೆಗಳಷ್ಟು ಉದ್ದದ ಪ್ರತ್ಯುತ್ತರ ನೀಡುತ್ತಿದ್ದ ಸುಜಾತಾ ಭಟ್ ಬಾಸಲ್ ಇವರನ್ನು ಸ್ಮರಿಸುತ್ತಾ, ಹಾಗೆ ಅವರೊಮ್ಮೆ ಒಂದು ಪೋಸ್ಟ ಕಳಿಸಿದ್ದರು ವಿದೇಶಿಗರೊಬ್ಬರ  ಬ್ಲಾಗ್ ಆರಂಭಿಸಿ ಮೂರ್ನಾಲ್ಕು ವರ್ಷಗಳೇ ಕಳೆದರು ಓದುಗರಿಲ್ಲ ಎಂದು ಅವರಿಗನಿಸಿ ಅವರು ಬರೆಯುವುದನ್ನು ನಿಲ್ಲಿಸಿ ಬಿಡುತ್ತಾರೆ. ಆಗ ಜನರು ಅವರ ಬರಹಗಳಿಗಾಗಿ ಕಾದು ಅವರಿಗೆ ಸಾವಿರಾರು ಸಂದೇಶಗಳು ತಲುಪಿದಾಗ ನಿಜವಾದ ಓದುಗರ ಸಂಖ್ಯೆ ಅರಿವಾಗುತ್ತದೆ. ಎನ್ನುವ ವಿಚಾರವೂ ನನಗೆ ಆಗಾಗ ನೆನಪಾಗುತ್ತಿತ್ತು. ಹಾಗೆ ಜನಮನ್ನಣೆ ದೊರಕದೇ ಹೋದರು ಒಂದಷ್ಟು ಆಸಕ್ತ ಮನಸ್ಸುಗಳು ನನ್ನೊಟ್ಟಿಗಿರುತ್ತಾರೆ ಎಂದು ನಂಬಿ ಮತ್ತು ಬರಹಗಳ ಸದಾ ಉಳಿವಿನ ಸಾಕ್ಷಿ ದಾಖಲೆ ಯಾಗಿಡಬಹುದು ಎಂಬ ಆಶಯದೊಂದಿಗೆ ಆರಂಭಿಸುತ್ತಿದ್ದೇನೆ.

ತಪ್ಪು ತಿದ್ದುಪಡಿಗಳಿಗೆ ಓಗುಡುತ್ತಾ. ಒಪ್ಪಿಗೆ ಮೆಚ್ಚುಗೆಗಳನ್ನು ಸ್ವೀಕರಿಸುತ್ತಾ. ಮುನ್ನುಡಿಯ ಅಲ್ಪವಿರಾಮದೊಟ್ಟಿಗೆ...

ಪೂರ್ಣವಿರಾಮದವರೆಗೂ ನಿಮ್ಮ ಸಹಕಾರ ಬಯಸುತ್ತೇನೆ.

                      ಇಂತಿ, 

                     ನಿಮ್ಮ ಸುಮಾ.ಕಂಚೀಪಾಲ್

ಪ್ರತಿಕ್ರಿಯೆಗಾಗಿ

sumagaonkar22@gmail.com