ಕೊಡೆ ಕೊಂಡು ಹೋದರೆ ಬಾರದ ಮಳೆ

ಹಾಯ್ ಎಲ್ಲ ಅರಾಮಾ? ಮಳೆ ಬಂದ್ರೆ ಸಾಕು, ಒಂದರ ಹಿಂದೆ ಒಂದು ಕಥೆ ಸಹಸ್ರಪದಿಯಂತೆ ಹರಿದುಬರುತ್ತೆ. ಮಳೆಗಾಲದಲ್ಲಿ ನಾನು ಬರೆಯುವ ಬ್ಲಾಗ್ ಸಂಖ್ಯೆ ಹೆಚ್ಚಾಗಬಹುದು. ಗುಡುಗು, ಮಿಂಚು ಮತ್ತು ಮಳೆ ಸದ್ದಿಗೆ ಏನಾದರೂ ಬರೀಬೇಕು ಅನ್ನೋ ಹಂಬಲ ಹೆಚ್ಚು. ಇವತ್ತು ನಾನು ಬೆಂಗಳೂರ್ ಮಳೆ ಮತ್ತೆ, ನಮ್ಮೂರ್ ಮಳೆ ಬಗ್ಗೆ ಬರೀತಾ ಇದ್ದೀನಿ. ಈ ಟಾಪಿಕ್ ಓಕೆನಾ? 

ಓಕೆನೆ ಬಿಡಿ, ಸುಮಾ ಬ್ಲಾಗ್ ಬರ್ಯೋದೆ ಅಪರೂಪ ಆಗಿರೋವಾಗ ನೀವ್ ಓದದೆ ಇರಲ್ಲ ಅನ್ನೋ ಭರವಸೆಲೇ ಬರೀತೀನಿ. ಬೆಂಗಳೂರಲ್ಲಿ ಮಳೆ ಬಂದ್ರೆ ನೀರು ಇಂಗೋಕೆ ಜಾಗ ಇಲ್ದೆ ಕೆಲವು ಕಡೆ ಅವಾಂತರ ಆಗೋದು ನಿಜ. ಆದ್ರೆ, ಊರಲ್ಲಿ ಹಾಗಲ್ಲ ನೋಡಿ. ಅಲ್ಲಿ ಸಿಮೆಂಟ್ ರೋಡಿಗಿಂತ ಮಣ್ಣು ರಸ್ತೆಯೇ ಜಾಸ್ತಿ. ನೀರು ಇಂಗುತ್ತೆ. ಸಾಧಾರಣ ಮಳೆ ಬಂದ್ರೆ ಇಬ್ಬನಿ ಬಿದ್ದ ಹಾಗಿರುತ್ತೆ. ಆದ್ರೆ ಬೆಂಗಳೂರಲ್ಲಿ ಸಾಧಾರಣ ಮಳೆ ಬಂದ್ರೂ ಪ್ರವಾಹವೇ ಉಕ್ಕಿ ಬರೋದು. ನಿನ್ನೆ ಆಫೀಸಿಗೆ ಬರೋಕ್ ಆಗ್ದೆ ಇದ್ರೆ ಮನೆಯಿಂದಲೇ ಕೆಲಸ ಮಾಡಿ ಅಂತ 'Work From Home' ಕೊಟ್ಟಿದ್ರು. ಯಾಕಂದ್ರೆ, ಮಳೆ ಬಂದು ಅಲ್ಲಲ್ಲಿ ಮರ ಬಿದ್ದು, ನೀರ್ ತುಂಬಿ ಟ್ರಾಫಿಕ್ ಹೆಚ್ಚಾಗಿತ್ತು. ಆದ್ರೆ ಆಫೀಸಿಗೆ ನಾನ್ ಹೋಗಿದ್ದೆ. ಬೆಂಗಳೂರಿಗೆ ಕೆಲಸಕ್ಕೆ ಅಂತಲೇ ಬಂದಿರೋ ನನ್ ತರದೋರೆಲ್ಲ ಅವತ್ತು ನಗ್ತಾ ಇದ್ರು. "ಇದೂ ಒಂದ್ ಮಳೆನಾ? ಮಳೆ ಅಂದ್ರೆ ನಮ್ಮೂರಲ್ ಬರತ್ತಲ್ಲ, ಅದು" ಅಷ್ಟಂದಿದ್ದೇ ತಡ ಹಳ್ಳಿಯಿಂದ ಬಂದಿದ್ದ ಜನ ಎಲ್ಲ ಸೇರಿ ಒಂದೊಂದಾಗಿ ಮಳೆಗಾಲದ ವಿವರಣೆ ಕೊಡೋಕೆ ಆರಂಭ ಮಾಡಿದ್ರು. ಆ ವಿವರಣೆ ಮಾತ್ರ ತುಂಬಾ ಮಜವಾಗಿತ್ತು. ಥೇಟೋ ಥೇಟು ಊರಿಗ್ ಹೋಗ್ಬಂದಾಗೇ ಇತ್ತು. 

ಮಳೆ ಅಂದ್ರೆ "ಗುಡುಗ್ಬೇಕು, ಮಿಂಚ್ಬೇಕು, ವಾರಗಟ್ಲೆ ಕರೆಂಟ್ ಹೋಗ್ಬೇಕು, ಗೇರ್ ಬೀಜ ಸುಡ್ಬೇಕು, ಒದ್ದೆ ಆದ ಯಾವ ಬಟ್ಟೆನೂ ವಾರಗಟ್ಟಲೆ ಒಣ್ಗ್‌ಬಾರ್ದು, ಹೊಗೆ ಜಂಬು ಆಗ್ಬೇಕು" ಇಷ್ಟೆಲ್ಲ ಹೇಳ್ತಾ ಎಲ್ಲರೂ ಆಫೀಸಿಂದ ಒಮ್ಮೆ ಊರಿಗ್ ಹೋಗ್ ಬಂದ್ರು. 

ಬೆಂಗಳೂರಲ್ಲಿ ಒಂದ್ ಮಳೆ ಬಂದ್ರೆ ಸಾಕು. "ನಂಗೆ ಶೀತ ಆಗಿದೆ. ನಂಗೆ ತಲೆನೋವು, ಅಯ್ಯೋ! ನಂಗಂತೂ ಸಿಕ್ಕಾಪಟೆ ಜ್ವರ" ಅನ್ನೋ ಡೈಲಾಗ್ ತೀರಾ ಸಾಮಾನ್ಯ. ಆದ್ರೆ ಊರಲ್ಲಿ ಮಳೆ ಬಂದ್ರೆ ಹೀಗೆಲ್ಲ ಆಗಲ್ಲ. ಯಾಕಂದ್ರಲ್ಲಿ ವಾತಾವರಣ ಪದೇ ಪದೇ ಬದಲಾಗೋಕೆ AC ಇರೋದಿಲ್ಲ.

ಮಳೆಲಿ ನೆಂದು ಮೆಟ್ರೋದೊಳಗೆ ಪ್ರವೇಶ ಮಾಡೋದು ಇನ್ನೊಂದು ಬೇರೆ ಕಥೆ. ಮಳೆಗಾಲ, ಚಳಿಗಾಲ - ಬೇಸಿಗೆಯಂತಿಲ್ಲ, ಎಲ್ಲ ಕಾಲದಲ್ಲೂ ಸಿಕ್ಕಾಪಟ್ಟೆ AC ಹಾಕಿ ಮಹಿಳೆಯರನ್ನ ಕೂಲ್ ಆಗಿಡ್ತಾರೆ ಈ ಮೆಟ್ರೋದವ್ರು. ಯಾಕಂದ್ರೆ, ಮಹಿಳಾ ಬೋಗಿಯಲ್ಲೇ ಈ AC ಹವಾ ಜಾಸ್ತಿ. ಮೆಟ್ರೋ ಇಳಿಯುವಷ್ಟರಲ್ಲೇ ಶೀತ ಆಗಿರುತ್ತೆ. ಒಂದು ಉದಾಹರಣೆ ಕೊಡ್ತೀನಿ ನೋಡಿ, ಆಫೀಸಿನ AC ಒಂದ್ ರೀತಿ. ನಂತ್ರ, ಬಸ್ಸಲ್ಲಿ ಇನ್ನೊಂದ್ ರೀತಿ. ನಡ್ಕೊಂಡು ಹೋಗುವಾಗ ಇನ್ನೊಂದು, ಮೆಟ್ರೋ ಹತ್ತಿದ್ರೆ ಮತ್ತೊಂದು, ಮನೆ ತಲ್ಪಿದ್ರೆ ಅದೇ ಮಗದೊಂದು. ಒಂದ್ ತಾಸಲ್ಲಿ ಇಷ್ಟೆಲ್ಲಾ ಹವಾಮಾನ ಬದಲಾವಣೆ. ಇದರಿಂದ ಆರೋಗ್ಯದಲ್ಲಿ ವೈಪರೀತ್ಯ. ಅದೇನೆ ಇರ್ಲಿ ಇತ್ಯಾಕೋ ಟ್ರಾಫಿಕ್ ಜಾಸ್ತಿನೆ ಇತ್ತು. 

ಬಿಎಂಟಿಸಿ ಬಸ್‌ನಲ್ಲಿ ಈ ಬ್ಲಾಗ್ ಬರ್ದು ಮುಗೀತು. ಬೆಂಗಳೂರು ಮಳೆಯ ಮತ್ತೊಂದು ವಿಶೇಷ ಅಂದ್ರೆ ನಿಮ್ಮ ಕೈಯಲ್ಲಿ ಕೊಡೆ ಇದ್ರೆ ಮಳೆ ಬರಲ್ಲ. 

ಸುಮಾ ಕಂಚೀಪಾಲ್