ಮೀನು ನಗುತ್ತದಾ!

ಮಳೆಗಾಲದಲ್ಲಿ ಮಾತ್ರವೇ ನೀರು ಹರಿಯುವ ಒಂದು ಸಣ್ಣ ಕಾಲುವೆ ಇದೆ. ಅದರಲ್ಲಿ ವರ್ಷದ ಮೂರು ತಿಂಗಳು ಮಾತ್ರ ನೀರು ಹರಿಯುತ್ತದೆ. ನೀರು ಹರಿಯುವ ಸಂಧರ್ಭದಲ್ಲಿ ಪುಟ್ಟ ಪುಟ್ಟ ಮೀನುಗಳು ಹುಟ್ಟಿಕೊಳ್ಳುತ್ತವೆ‌. ಇವುಗಳನ್ನು ನೋಡುವುದು, ತಿಂಡಿ ಹಾಕುವುದು, ದುಪ್ಪಟ್ಟ ಮತ್ತು ತೆಂಗಿನ ಚಿಪ್ಪಿನಲ್ಲಿ ಅವುಗಳನ್ನು ಹಿಡಿಯುವುದು ಮತ್ತು ನೀರಿನೊಳಗೆ ಕಾಲಿಟ್ಟು ಅವುಗಳ ಕಳಗುಳಿ ಸಹಿಸುವುದು ಇವೆಲ್ಲವೂ ಸಹ ಆ ಮೂರು ತಿಂಗಳ ಖುಷಿಯ ಸಂಗತಿ. 

ಅಲ್ಲಲ್ಲಿ ಕಚಗುಳಿ

ಇವುಗಳನ್ನು ನೋಡುತ್ತಿದ್ದಾಗಲೆಲ್ಲ ನನಗೆ ಹತ್ತಾರು ಪ್ರಶ್ನೆಗಳು ಕಾಡುತ್ತವೆ. 'ಪ್ರೀತಿಸುವವರನ್ನು ಕೊಂದುಬಿಡಿ' ಎನ್ನುವ ಜೋಗಿ ಅವರ ಪುಸ್ತಕದಲ್ಲಿ ಓದಿದ್ದೆ, ಮೀನಿನ ಏಕಾಗ್ರತೆ ಕೇವಲ ಐದು ಸೆಕೆಂಡ್ ಮಾತ್ರ ಎಂಬುದರ ಕುರಿತು ಅವರು ತಿಳಿಸಿದ್ದರು. ಅದರ ನಂತರ ಕುತೂಹಲ ಹೆಚ್ಚಿ ಗೂಗಲ್ ಮಾಡಿ ನೋಡಿದ್ದೆ. ಅತಿ ಕಡಿಮೆ ಹೊತ್ತು ಏಕಾಗ್ರತೆ ಹೊಂದಿರುವ ಜೀವಿ ಮೀನು. ಮನಸು ಮರ್ಕಟದಂತೆ ಎನ್ನುತ್ತಾರೆ. ಆದರೆ ಮಂಗನ ಮನಸಿಗಿಂತಲೂ ಚಂಚಲ ಮನಸು ಮೀನಿನದ್ದು. 

ಮೀನಿನ ಹೆಜ್ಜೆ ಗುರುತಾದರೂ ಕಂಡು ಹಿಡಿಯಬಹುದು, ಹೆಣ್ಣಿನ ಮನಸಿನ ಭಾವ ತಿಳಿಯದು ಎಂಬ ಮಾತನ್ನೂ ಕೇಳಿದ್ದೇನೆ. ಅದು ಹಾಗಿರಲಿ ಬಿಡಿ ಇನ್ನೊಂದು ಪ್ರಶ್ನೆ ಇದೆ. 

ಮೀನು ಗುಡಿ

ಯಾವಾಗಲೂ ಹರಿಯುವ ನೀರಿನ ವಿರುದ್ಧ ದಿಕ್ಕಿನಲ್ಲಿ ಮುಖಮಾಡಿ ಸದಾ ಈಜುತ್ತಿರುವುದನ್ನು ನಾನು ಗಮನಿಸಿದ್ದೇನೆ. ಏಕೆ ಅವುಗಳ ರೆಕ್ಕೆ ಸೋಲುವುದಿಲ್ಲವೇ?! ಅದನ್ನು ನೋಡುವಾಗ ನನಗೆ ಕಾಣಿಸುವುದು ಒಂದೆ, ದೇಹದ ತೂಕ ಇಳಿಸುವ ಸಲುವಾಗಿ ಕೆಲವರು treadmill ನಲ್ಲಿ ನಿಂತಲ್ಲೇ ಓಡುತ್ತಾರಲ್ಲಾ ಇವುಗಳು ಹಾಗೆ. ಆದರೆ ಇವು ದಿನದ ಇಪ್ಪತ್ನಾಲ್ಕು ಗಂಟೆಯೂ ಓಡುತ್ತವೆ. ಲೆಕ್ಕ ಹಾಕಿದರೆ ಎಷ್ಟು ಕಿ.ಮಿ ಆಗುತ್ತಿತ್ತೊ ಗೊತ್ತಿಲ್ಲ. 

ನೀರಿನ ವೇಗ ಒಮ್ಮೊಮ್ಮೆ ಬದಲಾಗುತ್ತದೆ. ಹೆಚ್ಚು ಮಳೆ ಬಂದಾಗ ರಭಸವಾಗಿ ನೀರು ಹರಿಯುತ್ತದೆ. ಆಗಲೂ ಇವು ಸ್ಥಿರವಾಗಿ ಅಲ್ಲೆ ಉಳಿಯುತ್ತವೆ. ಇವುಗಳಿಗಿಂತ ದೊಡ್ಡದಾದ ಎಷ್ಟೊ ಕಲ್ಲು, ಮರದ ದಿಮ್ಮಿಗಳು ನೀರಿಗೆ ಕೊಚ್ಚಿ ಹೋಗುತ್ತವೆ. ಇನ್ನು ಕೆಲವರು ಅಕ್ವೇರಿಯಂ ನಲ್ಲಿ ಮೀನು ಸಾಕುತ್ತಾರೆ. ಇದರಿಂದ ಮನಸಿಗೆ ನೆಮ್ಮದಿ ಸಿಗುತ್ತದೆ‌, ರಕ್ತದೊತ್ತಡ ನಿವಾರಣೆಯಾಗುತ್ತದೆ ಎನ್ನುತ್ತಾರೆ‌. ನಾನೂ ಮನಸಿಗೆ ಕೆಲಸ ಹೆಚ್ಚಾದಾಗ ಕೂತು ವಿಶ್ರಮಿಸಿ ಬರುತ್ತೇನೆ.

ಮತ್ಸ್ಯ ಮಕ್ಕಳಿಗೆ ಅನ್ನಪ್ರಾಶನ.

ಇನ್ನೊಂದಿಷ್ಟು ಮುಗಿಯದ ಪ್ರಶ್ನೆ ಇದೆ‌ ನಿಮಗೆ!! 

ಮೀನು ನಗುತ್ತದಾ?

ಮೀನು ನಿದ್ರಿಸಬಹುದಾ?

ಮೀನು ತನ್ನ ಜೀವಿತಾವದಿಯಲ್ಲಿ ಬಾಯಿಂದ ಶಬ್ಧ ಹೊರಡಿಸುತ್ತದೆಯಾ?

ಯಾವುದಾದರೂ ಮೀನು ಅಂಗವಿಕಲವಾಗಿ ಹುಟ್ಟಿರಬಹುದಾ?

ನೀರು ಇಂಗಿದಮೇಲೆ ಇವು ಎಲ್ಲಿ ಮರೆಯಾಗುತ್ತದೆ? ವಲಸೆ ಹೋಗುತ್ತದಾ? ಎಂದೂ ನೀರಿರದ ಕಾಲುವೆಯಲ್ಲಿ ಹತ್ತೆ ಹತ್ತು ದಿನದಲ್ಲಿ ಇವು ಹೇಗೆ ಮರಿಗಳಾಗಿತ್ತವೆ.? 

ತಮಾಷೆ ಎನಿಸಿದರೂ ಇದರಲ್ಲೊಂದು ಕುತೂಹಲ ಇದೆ ಅಂದುಕೊಳ್ಳುತ್ತಾ, ನಿಮಗೆ ಉತ್ತರ ಗೊತ್ತಿದ್ದರೆ ತಿಳಿಸಿ, ನಿಮಗೂ ಇಂತಹದೇ ಪ್ರಶ್ನೆ ಇದ್ದರೆ ಅದನ್ನೂ ತಿಳಿಸಿ. 

ಸುಮಾ.ಕಂಚೀಪಾಲ್