ಬಾಲ್ಯದ ಘಮಲು ಭಾಗ ೨

ಚಿಕ್ಕವರಿರುವಾಗ ಮೂಗಲ್ಲಿ ಸುಂಬಳ ಸುರಿಸಿ ಸೊರ ಸೊರ ಸ್ವರ ಹೊರಡಿಸುತ್ತಿದ್ದ ದಿನಗಳು ನೆನಪಾಗುತ್ತಿವೆ. ಹೀಗೆ,... ಬರೆಯೋದಿಕ್ಕೆ ಅದು ಇದು ವಿಷಯ ಹೊಳೆಯುತ್ತಿರುವಾಗ ಬಾಲ್ಯದ ಕುರಿತೇ ಬರೆಯಬೇಕು ಎಂಬ ಮಾತು ಬಂತು ಅದಲ್ಲದೇ ವಿಷಯವನ್ನೂ ಅವರೇ ಸೂಚಿಸಿದ್ದರಿಂದ ಬಾಲ್ಯದ ಬುತ್ತಿಗಂಟಿಗೆ ಇನ್ನೊಂದಿಷ್ಟು ನೆನಪುಗಳನ್ನು ತುಂಬೋಣ ಎನಿಸಿತು, ನಿಮ್ಮ ಬಾಲ್ಯದ ನೆನಪುಗಳೇನಾದರು ಇದ್ದರೆ ನನಗೂ ತಿಳಿಸಿ.

ಒಂದೊಮ್ಮೆ ಜ್ವರ ಬಂದರೂ ಶಾಲೆಗೆ ರಜಾ ಹಾಕದ ದಿನಗಳು ಅವು, ಅದೆಷ್ಟು ಮುಖ್ಯವಾದ ತರಗತಿಗಳು ಇರುತ್ತಿದ್ದವೋ? ಏನೋ!? ಎಂಬಂತೆ ಹಠಮಾಡಿ ಶಾಲೆಗೆ ಹೋಗೋದು, ಅರ್ಧ ತರಗತಿಯಲ್ಲಿ ಸುಸ್ತಾಗಿ ಬಿದ್ದು ಶಾಲೆಯವರೆಗೆ ಮನೆಗೆ ಕಳುಹಿಸಿ ಕೊಡುತ್ತಿದ್ದ ದಿನಗಳು ನಮ್ಮ ಕನ್ನಡ ಶಾಲೆ ದಿನಗಳು.

ಆಟ ಆಡುವಾಗ ಬಿದ್ದು ಮೊಣಕಾಲಿಗೆ ಆದ ಗಾಯ ಇನ್ನೇನು ಮಾಸುತ್ತದೆ ಎನ್ನುವಷ್ಟರಲ್ಲಿ ಮತ್ತೆ ಬೀಳದೆ ಇದ್ದರೆ ನಮ್ಮ ಜಾಯಮಾನಕ್ಕೆ‌ ಅವಮಾನ ಎನ್ನುವ ಗಂಡು ಹುಡುಗರು. ಕೈ ಕಾಲಿಗೆ ಆದ ಗಾಯಕ್ಕೆಲ್ಲಾ ಬೇರೆ ಮದ್ದೇನು ಇಲ್ಲ. ತಕ್ಷಣ ಹಾದಿ ಬದಿಯ ಕಾಂಗ್ರೇಸ್ ಗಿಡ ಸಿಕ್ಕರೆ ಸಾಕು ಅದನ್ನೇ ಅರೆದು ಹಚ್ಚುವುದು. ಅದರ ಹಸಿರು ರಸ ರಕ್ತಕ್ಕೆ ಬಿದ್ದಾಗ ಗಾಯದಿಂದ ರಕ್ತ ಸೋರುವುದು ನಿಲ್ಲುತ್ತಿತ್ತು. 

ಸರಿಯಾಗಿ ಟೈ ಕಟ್ಟಿಕೊಳ್ಳಲೂ ಬರದ ಕಾಲ.

ಇನ್ನು ವರ್ಷಕ್ಕೊಂದು 

ಪ್ರತಿಭಾ ಕಾರಂಜಿ, ಕ್ರೀಡಾಕೂಟ,

ಪರೀಕ್ಷೆ, ಶಾರದಾ ಪೂಜೆ, 

ವಾರ್ಷಿಕೋತ್ಸವ ಬೇಸಿಗೆ ರಜ,

 ಜನವರಿ ಇಪ್ಪತ್ತಾರರ ಭಾಷಣ, 

ಇಷ್ಟಾದರೆ ಆಯಿತಲ್ಲ ಪೂರ್ತಿ

ಒಂದು ನತ್ತೆ ಕಳೆದು ಇನ್ನೊಂದು ನೆತ್ತೆ.

ದೀಪ ಬೆಳಗುವ ಖುಷಿ.

ಮನೆಗೆ ಬಂದರೆ ರಜೆಯಲ್ಲಿ ನೆಂಟರ ಮನೆ ತಿರುಗಾಟ ಆಟತ್ತಿ ಮನೆ ಆಟ ಮಣ್ಣಿನ‌ ಗೊಂಬೆ , ಕರಟದ ಪಾತ್ರೆ, ಎಲೆಗಳೆ ದುಡ್ಡು ಕಾಸು ಎಂದೆಲ್ಲಾ ಇದ್ದ ಬದ್ದ ಒಂದೇ ಜಾತಿಯ ಎಲೆಗಳೆಲ್ಲ ಕೊಯ್ದು ಬ್ಯಾಂಕಿನಲ್ಲಿಡುವುದು, ಸಲ್ಪ ದೊಡ್ಡದಾಗಿರುವ ಎಲೆಗೆ ಮೌಲ್ಯ ಹೆಚ್ಚು ಅದನ್ನು ಕೊಟ್ಟು ಸುಳ್ಳು ಸುಳ್ಳು ಸಾಮಾನು ಖರೀದಿ ಮಾಡುವುದು, ಈ ಆಟಗಳೇ ಮುಂದೆ ನಿಜವಾಗುತ್ತಾ ಜೀವನ ರೂಪಿಸುತ್ತವೆ ಎನ್ನುವ ಅಂಶ ಆಗ ಗೊತ್ತಿರುವುದಿಲ್ಲ.

  ಯಾವ ಕಟ್ಟಡದ ಉದ್ಘಾಟನೆಗೂ ಈ ನಳಕ್ಕೆ ಸಿಕ್ಕಷ್ಟು ಪ್ರಾಮುಖ್ಯತೆ ಇಲ್ಲ !

ಹುಡುಗರಿಗೆ ಒಂದು ಟೈಯರ್ ಸಿಕ್ಕರೆ ಸಾಕು ಅದೇ ಅವರ ಗಾಡಿ, ಹುಡುಗಿಯರದು ಗಿರಿಗಿಟ್ಟಲೆ ಮತ್ತು ಕಲ್ಲಾಟ ಬಲು ಜೋರು, ಐದು ಕಲ್ಲಿನ ಆಟ, ನಾಯಿ ಮೂಳೆ, ಜೋಡಿಬಲೆ ಆಹಾ! ನೆನಯುತ್ತಿದ್ದರೆ ಮತ್ತೆ ಈ ಜಂಜಾಟಗಳನ್ನು ಬಿಟ್ಟು ಮತ್ತೆ ಆಡೋಣ ಎನಿಸುವುದಿಲ್ಲವೇ? 

ದಿನ ಬೆಳಗಾದರೆ ಕಸ ಹೆಕ್ಕಬೇಕು

ಬಾಲಮಂಗಳ, ಚಂಪಕ, ಮಂಡೂರಾಯನ‌ ಕತೆ, 

ಪ್ರಜಾವಾಣಿ ಪೇಪರ್ ಕೊನೆಯ ಭಾನುಪುರವಣಿ ,

ಚುಕ್ಕಿ ಸೇರಿಸಿ ಚಿತ್ರಬರೆದು ಅದಕ್ಕೆ ಬಣ್ಣ ಹಾಕುವುದು, ಎಲೆಗಳನ್ನು ಪಟ್ಟಿಗಂಟಿಸುವುದು, 

ಬೇರೆಲೆ ಎಂಬ ಒಂದು ಜಾತಿ ಎಲೆ ಇರುತ್ತದೆ ಅದನ್ನು ಪಟ್ಟಿಯೊಳಗಿಟ್ಟು ಎಲೆಯ ತುದಿಗಳಿಗೆಲ್ಲಾ ಬೇರು ಬರಿಸುವುದು, ಬಣ್ಣ ಬಣ್ಣದ ಚಾಕ್ ಪೀಸ್ ಸಂಗ್ರಹಿಸುವುದು,

ದಾರಿ ಉದ್ದಕ್ಕು ಕಲ್ಲುಗಳಿಗೆ ಹೊಸ ವರ್ಷದ ಶುಭಾಶಯ ಬರೆಯೋದು

ಸಂಕ್ರಾಂತಿ ಬಂತೆಂದರೆ ಕಾಳಿನಲ್ಲಿ ಹೊಡೆದಾಡುವುದು.

ಬಾಲ್ಯದ ಹಕ್ಕಿಗೆ ಅದೆಷ್ಟು ಗರಿಗಳಿವೆ ಅಲ್ಲವಾ?